مش كل اللي بيقربلك بيحبك… أحيانًا بيستناك تقع

 بقلم : إيمان المهدى 

خاف من عدوك مرة… وخاف من حبيبك ألف مرة

جملة بنسمعها كتير، لكن قليل اللي بيفهمها بجد.

إحنا بطبيعتنا بنخاف من الغريب، من العدو الواضح، من اللي عارفين إنه مش بيحبنا.

لكن عمرنا ما بنخاف من القريب… من اللي بنحكيله أسرارنا، ونشاركه تفاصيل يومنا، ونثق فيه من غير حساب.

وهنا تبدأ المشكلة.

لأن أخطر الأذى مش اللي بييجي من برّه…

الأذى الحقيقي بييجي من جوّه، من حد عارف نقاط ضعفك كويس، وعارف إمتى يضرب.

مش كل ابتسامة صافية، ومش كل كلمة حلوة نيتها خير.

في ناس بتقرب علشان تعرف عنك أكتر، مش علشان تحبك أكتر.

وفي ناس وجودها في حياتك مش دعم… لكن مراقبة.

والأصعب من كده؟

إن في ناس بتتعب لما تشوفك أحسن منها.

الحسد مش دايمًا بيبقى من بعيد، أوقات بيبقى من أقرب الناس ليك.

وده اللي القرآن نبهنا له بوضوح:

﴿وَمِن شَرِّ حَاسِدٍ إِذَا حَسَدَ﴾

والنبي ﷺ قال:

"إياكم والحسد، فإن الحسد يأكل الحسنات كما تأكل النار الحطب"

يعني الخطر مش مجرد إحساس… ده ممكن يدمر.

بس خدي بالك…

الكلام ده مش معناه إنك تشكي في كل اللي حواليك، ولا تعيشي لوحدك.

المشكلة مش في القُرب… المشكلة في “مين” القريب.

في فرق كبير بين حد بيفرح لنجاحك، وحد بيستحمله.

فرق بين حد بيدعمك، وحد بيستنى اللحظة اللي تقع فيها.

والفرق ده بيبان في المواقف، مش في الكلام.

علشان كده…

ما تديش ثقة كاملة لأي حد بسهولة،

وما تحكيش كل حاجة لأي حد،

وخلي دايمًا بينك وبين الناس حدود.

مش علشان تبقي قاسية…

علشان تحمي نفسك.

في الآخر، مش كل اللي جنبك معاك…

ومش كل اللي بيضحكلك بيتمنالك الخير.

أوقات، أقرب حد ليك…

هو أكتر حد محتاج تاخد بالك منه.